Searching for the young soul rebels

Andaba musicalmente gozando de varias descubertas que o amigo Moi me fixera chegar desde o seu paradiso particular a semana pasada, e tamén ao tanto do que ía saíndo por Galiza. Á espera do novo disco de Fanny & Alexander (do que xa coñecemos algún tema de adianto) nos pasados días tivemos ocasión de escoitar o primeiro de Som do Galpom , editado por Falcatruada como grupo gañador do concurso Nsaio no Camiño, e tamén o primeiro de Magritte, en edición dixital da Regueifa Plataforma.

Porén, despois dunha fin de semana na que tiven a oportunidade de coñecer a un dos máis destacados xogadores dos Porcos Bravos (o combinado nacional galego na Anglogalician Cup), este domingo púxoseme o corpo máis anglófilo e cantábrico do habitual. Sabido é que nas escrituras das terras en Ribadeo facíase constar os seus lindes indicando que, polo norte, lindaban "con Inglaterra, mar por medio", así que tampouco debería resultarnos tan estraña a especial querencia ribadense polo northern soul e a cervexa compartida con amigos. O día, nese sentido, foi completo. Pola mañá houbo situacionistas ingleses dos 60 e viños (cos riquísimos chourizos do Cabás e garabanzos con bacallau do Recuncho) polas Catro Calles; á tarde, banda sonora dos Dexys Midnight Runners e partido do Barça con pinta de Guinness incluída.

Velaquí un video para os celtic soul brothers do Toco do Recuncho, e chuchos ribadenses para Fran e Marta.